isumannaatsuunissaannut siunnersuutit pitsaasut
Silarsuarmi digitalimik atuiffiusumi inuuvugut – meeqqagut aamma inooqataapput. Meeqqat pillugit aammalu internetsimi ajutoorfiusinnaasut pillugit annilaarnartunik tusakulavugut. Silarsuarli digitalimik atuiffiusoq ajortortaqarsinnaagaluartoq, ajoqutissanit iluaqutissat amerlarnerupput. Digitali atorlugu teknologii eqqortumik atoraanni, assigiinngitsorpassuartigut inuunitsinni iluaqutissarsiffigisinnaavarput. Uagullu inersimasutut angajoqqaatullu meeqqagut ilinniartitassaraagut digitalip silarsuaani ima toqqissisimanartigisumik sapinngisamillu eqqortumik qanoq atuinissaannik. Qanoq atuisinnaanerannut siunnersuutitsialaat aajuku.
Oqaloqatigiinneq pilersiguk
Meeqqavit silarsuaanut digitaliusumut peqataagit. Pimooruguk, ammagit tapersersuillutillu. Ilaqutariit inuunissi ilaatut meeqqavit interneternerani peqatigiuk. Pinnguaatinik pinnguaqatigikkit, app-it, pinnguaatit imaluunniit web-ertarfiit nuannarinerpaasaat pillugit oqaloqatigikkit. Qanoq atugassaaneri aammalu atornerisigut sunik pissarsiaqarfigisinnaaneraat paasiniarsigit. Interneternerminni sunik misigisaqarsimanersut apersukkit, kikkut oqaloqatigineraat aammalu ajornartorsiuteqarnersut ajornartorsiuteqarsimanersulluunniit.
Ilinnut saaffiginnittuarsinnaanerannik oqarfigikkit, qanorluunniit pisoqaraluarpat. Internetimi nuanninngitsumik allaqateqarsimanini misigisaqarsimaniniluunniit pillugu nalunaaruteqarpat, meeqqavit saaffiginninnera asuleernerunngitsutut tigujuk.
Malittarisassaliigit killissaliillutillu
Eqqaamajuk uaguugatta angajoqqaatut imaluunniit angajoqqaatut akisussaatitaasutut meeqqatsinnut killiliisussaasut. Ukiuinut naleqquttunik atortuminnik atuinissaannut aammalu internetimut isernissaannut malittarisassaliorit unioqqutinneqarpata kinguneqartussannguillutit.
App-it nittartakkallu nuannarineqarluartut, soorlu YouTube, TikTok, Instagram aammalu SnapChat meeqqat inuusuttullu illersorniarlugit ukiunut killersuinertaqarput. Taamaattumik meeqqatit ukiukitsuuppata imaluunniit piareersimanngippata akueriniaqinagit web-inut ilaasortaaffeqalerniarlutik nalunaarnissaannik.
Maligassiuisuugit
Digitalimik atuinitsinni uagut nammineq ileqqugut meeqqat malugisarpaat. Oqarnerinnaq oqarnerup naammassinissaanit ajornannginerusinnaavoq, namminerli teknologiimik atuinermi eqqissisimasumik atueriaaseqarnissap eqqumaffiginerunissaa pingaaruteqarpoq. Taamaattumik maligassiuisuugit malittarisassanik nammineq malinninnikkut. Imaluunniit meeqqatit nasuiaatikkit, malittarisassat inersimasunut sooq allaanerunersut.
Meeqqagut digitalimik pisut nalaanni akisussaassusilimmik qanoq internetimik atuisinnaanerannik taamaatut ikiorsinnaavagut.
innuttaasut akisussaassusillit
Meeqqap digitalimik atuinermini tumai sianigikkit
Meeqqatit digitalimik atuinerminni tumiminnik nakkutiginninnissaannik ilinniartikkit. Assersuutigalugu googlemi ujaasigaangatta, YouTubemi videomik isiginnaaraangatta imaluunniit facebookimi quppernitsinni paasissutissanik nammitsinnut tunngasunik allakkaangatta "tumeqalersarpugut".
Meeqqanut minnernut malittarisassaq oqitsunnguaq tassaasariaqarpoq, meeqqap atini, telefonnormuni imaluunniit assini angajoqqaat angajoqqaatulluunniit akisussaatitaasoq akuersisimatinnagu allassanngikkaa.
Meeqqat angajulliumaat quppernernik attaveqaqatigiittarfinnik, soorlu Facebookimik, atuisut, imminnut paasissutissaasunik sunik aammalu assinik sorlernik ikkussinissartik mianersuutigisariaqarpaat.
Nammineq inuunerisamut tunngasut aaqqiinerit qanorluunniit ikkaluarpata, facebookimut ikkunneqartut kikkunnit takuneqarnerat imaluunniit qanoq atorneqarnerat aqussinnaajunnaangajassavat. Taamaattumik aammattaaq eqqaamallugu meeqqavit ataqqinissaat, taakkulu assinginik internetimut ikkussiniaqinak akuersiseqqaarnagit.
Internetertillutit isorniartumik pissuseqarit
Meeqqat – inersimasutuulli – eqqumaffigissavaat, paasissutissat internetimiittut tamarmik eqqortuuneq, eqqoqqissaartuuneq imaluunniit naleqquttuuneq ajornerat. Meeqqat ilinniartiguk paasissutissanik nalilersuinissaanik, isorniartuunissaanik aammalu paasissutissanik inunnillu internetertunik eqqumaffiginninnissaannik.