Atuisunut malitassat atuuffiat

Internetimut kiffartuussivimmik, Tusass-mut akuersissut naapertorlugu ingerlatseqatigiiffimmit neqeroorutigineqartumik atuinissamutisumaqatigiissutinut, Tusass-p kiffartuussinernik pilersuineranut ingerlatsineranullu atuisunut ataasiakkaanut suliffeqarfinnullu inuussutissarsiornermik ingerlataqartunut minnerusunut piumasaqaatit nalinginnaasut tapertaralugit kiffartuussinermi piumasaqaatit uku atuutissapput. Piumasaqaatit imminnut akerleriippata, kiffartuussinernik atuisuunermut piumasaqaatit salliutinneqassapput.

Pisariaqartinneqartut

Atuisuunermut isumaqatigiissut matuma naammassineqarnissaanut, pilersuinerup Tusass-p internetimut kiffartuussiviata iluani pinissaa pisariaqarpoq. Tusass-p kiffatuussivii pillugit paasissutissat Tusass-mut saaffiginninnikkut pissarsiarineqarsinnaapput. Atuisoq – isumaqatigiissusiornermi imaluunniit kingusinnerusukkut – Tusass-p kiffartuussivianiinngippat, kiffartuussinermik naammassinnissalluni Tusass pisussaatitaanngilaq.

Tusass-p pilersuisussaatitaanera, tassunga mailboksit

Ilanngullugit Tusass-p tunisassiaanut naqitami, atuisuunermut toqqarneqartumut tunngasumi atuisoq Tusass-mi internetimut atortunik atuisinnaanersoq takuneqarsinnaavoq.

Ingerlatsineq sukkassuserlu

Teknikki, aserfallatsaaliuineq ingerlatsinerlu pissutigalugit pisariaqartinneqartutut Tusass naliliippat, internetikkut kiffartuussinernik allannguinissanik pisariaqartinneqartunik allanngortiterissalluni Tusass pisinnaatitaavoq, taakkununngalu ilaatigut atuisuunermi ateq, password isissutissallu allat, atuisuunermut atatillugu Tusass-mit tunniunneqarsimasut ilaapput.

Aamma oqartussaasunit piumasaqaatit naammassineqarnissaannut pisariaqartinneqarsinnaasunik allannguissalluni Tusass pisinnaatitaavoq. Sarsuatitsilluni kiffartuussinerit atorneqarnerinut atasumik internetimik nioqqutip sukkassusaanik annikillisitsinissamut Tusass imminut pisinnaatippoq. Allannguinernut atatillugu atuisup aningaasartuutigisinnaasai Tusass-mit susassarineqanngillat, aammalu tamatumunnga atatillugu Tusass taarsiissuteqarnissamut piumasaqarfigineqarsinnaanngilaq.

Kiffartuussinermi teknikkikkut pisinnaasat nassatarisaanik attaveqarnerup sukkassusia allanngorarsinnaammat, atuisup ilisimariissavaa. Attaveqaatinut angallattakkanut tamanut sukkassuseq protokol overhead-imut ilaatinneqarpoq. Ingerlatsinermut isumannaallisaanermullu tunngassuteqartut pissutigalugit internetimik atuinermi periarfissanik killilersuigallarsinnaanissamut Tusass imminut pisinnaatippoq.

Aammattaaq Tusass imminut pisinnaatippoq (atuisoq Tusass-mit taarsiiffigineqarnissamik piumasaqarsinnaanani, makku pissutigalugit):

• Atuisup atortuini iserfissiat (taakkununnga proxies-it ilanngullugit) ammasut, kiisalu e-mail-serverit (relays) ammasut atornerlunneqarsinnaasut misissussallugit.

• E-mail-it tigusat nassiussallu virusinik, spam-inik imaluunniit phishing-inik pissarsiviusinnaasutut nalilerneqartut ingerlaqqinnissaat itigartissallugit.

• Inuup allap, soorlu virusinik, spam-inik imaluunniit phishing-inik siaruarterilluni attaveqaatinik atornerluisimasutut pasineqartup attaveqaataanik akornusiissalluni.

• E-mail-it piffissap ataatsip iluani nassiunneqartut amerlassusissaannik killiliissalluni.

• Serverinut software-nik pisariaqartitsineq naapertorlugu piorsaassalluni.

Dynamisk IP-adresse

1. IP-adressi allanngorartoq (Dynamisk IP-adresse) pillugu paasissutissat nalinginnaasut
Angerlarsimaffimmi sulinermut atatillugu internernetimik atuinissamik pisiguit internetimut attaveqalissaatit, taannalu IP-adressimik allanngorartumik atuivoq. IP-adressi systemitsinnit tunniunneqartarpoq, aamma piffissakkaartumik ilisimatitseqqaarnani allanngorsinnaavoq. Tassa imaappoq internetimut attaveqaatit aalajangersimasumik IP-adresseqarnavianngilaq, kisianni piffissap ingerlanerani adressimik allanngorartumik atuissaaq.

2. Atuineq Pisussaaffiillu

IP-adressimik allanngorartumik atuinikkut ilisimatitseqqaarnani IP-adressip allanngorarnissaa akuerissavat, aamma attaveqaatit konfigurationit imaluunniit kiffartuussissutit IP-adressimik allanngoranngitsumik atuisariaqarfiusut naleqqussarnissaannut illit akisussaaffeqarputit.

3. Akisussaaffimmik atorunnaarsitsineq

Illit IP-adressivit allanngorartuunerata kingunerisaanik ajornartorsiutaalersinnaasunut Tusass A/S akisussaasuunngilaq. Tassani pineqarput serverinut avataaniittunik aamma VPN-imik attaveqaatinik atuisinnaajunnaarneq, ungasianiit isersinnaajunnaarneq kiffartuussissutinilluunniit allanik IP-adressimik allanngoranngitsumik atuisariaqarfiusunut isersinnaajunnaarneq.

4. Isumannaallisaaneq aamma Nammineq inuuneq

Angerlarsimaffimmi sulinermut atatilugu interneteqaruit IP-adressi akuttunngitsumik allanngortassaaq, tamatumalu kingunerisaanik avataani ingerlataqartut illit attaveqaatini ingerlassimasannik malinnaanissaannut ajornarnerulissaaq. Taamaattorli nalinginnaasumik isumannaallisaanermi iliuuserisassat suli iliuuserissavatit, tassunga ilanngullugit kode isissutissaq paasiuminaannerusumik atuineq, VPN-imik kiffartuussissutit aamma isumannaallisaanermik nutarterineq.

5. IP-adressimut allanngoranngitsumut allanngortitsineq

IP-adressimik aalajangersimasumik, allanngoranngitsumik pisariaqartitsissaguit atuisuuffiit allanngortinniarlugu Tusass Suliffeqarfinnut attavigissavat. Qinnuiginninnikkut neqeroortoqartarpoq aamma allanngortitsineq suli annerusumik aningaasartuuteqarfiusinnaavoq immikkullu ittumik atugassaqartitsisinnaalluni.

6. Akiliisitsisarnermik allanngortitsineq

Pitsaanerpaamik akileraartitsisarnissamik isumannaallisaanermillu qulakkeerinninniarluta IP-mik kiffartuussissutit allanngorartut allanngortinnissaannut nutarternissaannulluunniit imminut pisinnaatippagut. Allannguut sunaluunniit illit internetimut attaveqaatinnut annertuumik sunniuteqanngitsumik atuutilersinneqassaaq aamma annerusumik allannguisoqassappat allannguutit pillugit nalunaarfiginissat anguniassavarput.

7. Atuinermi killilersuutit

Kiffartuussissutit imaluunniit applikationit ilaat immikkut IP-adressimik atuiffiusariaqartartut IP-adressimut allanngorartumut aporaassinnaapput. Kiffartuussissutit taakku IP-mut eqqortumik ingerlanissaannik qulakkeerinninnissaq illit akisussaaffigaat. Kiffartuussissutinik taakkuninnga atuinermi killilersuutaasunnaasunut atassutaarunnernulluunniit Tusass A/S akisussaasuunngilaq.

E-mail adresse

Tusass-p internetimut iserfiusinnaasumut atuisuunermut toqqarneqartumut tunisassiamut paasissutissanut allattuiffiani allassimavoq, atuisoq allakkanut nakkartitsivinnik ataatsimik amerlanerusunilluunniit e-mail adresse-linnik pinissamut pisinnaatitaaffeqarnersoq. E-mail adresse-usinnaasut Tusass-p pigisarai, atuisuunerullu uninnissaata tungaanut atuisumut taamaallaat atuuttussaallutik.

E-mail adresse-usinnaasut inuup allap pisinnaatitaaffiinik innarliinnginnissaat atuisup akisussaaffigaa. Atuisup tunisassiamut paasissutissanut allattuiffimmi toqqorneqarsinnaasutut allassimasut, aammalu e-mail-inik nassitsinermi killissarititassatut allassimasinnaasut qaangissanngilai.

Atuisunut isumaqatigiissut

Tusass-mut akuersissut naapertorlugu kiffartuussinernik neqerooruteqarnermut atatillugu atuisoq Tusass-mut akilinngitsuukkaminik akiitsoqarpat, Tusass-p atuisunut isumaqatigiissusiornissaq itigartissinnaavaa.

Atuisoq Tusass-mit piumaffigineqarnermini kinaassutsini uppernarsarsinnaasariaqarpaa aammalu paasissutissat eqqortuunerat uppernarsarsinnaasariaqarluni. Kinaassutsimut ilisarnaat assitalik piumasarineqarsinnaavoq. Najukkap allanngornerani atuisoq erngerluni Tusass-mut tamanna pillugu nalunaaruteqassaaq.

Atuisup akisussaaffia

Atuisup normua, atuisup aqqa, password (isissutissaq), IP-adresse-usinnaasut aammalu isissutissat allat, atuisuunermut atatillugu Tusass-mit atugassanngortinneqassapput. Atuisup normua, password il.il. inummut allamut tunniunneqassanngillat, tassani atuisuusinnaasoq nalunaarsorneqarsimasoq pineqanngilaq. Paasissutissat taakku atornerlunneqarpata atuisup allap akisussaaffigissavaa.

Atuisup normua, atuisup aqqa, password (isissutissaq), IP-adresse isissutissallu allat, Tusass-mit atugassanngorlugit atukkiunneqartut Tusass-p pigisarai, aammalu atuisuunerup uninnerani utertinneqartussatut isigineqarlutik.

Atuisup internettikkut paasissutissat suut atussanerlugit nammineerluni aalajangigassaraa. Tassani paasissutissat internetikkut pissarsiarineqarsinnaasut tamarmik pineqarput.

Atuisup internetimik atuinerani atortussaminilluunniit aallernerani imaluunniit e-mail-inik tiguneqartunik programminik ammaanerani qarasaasiaq virusinik pissarsisinnaavoq, imaluunniit atuisup internetikkut ujarlernerani qarasaasiaq avataanniit sunniuteqarfigineqarsinnaalluni. Tusass pissutsinut taamaattunut sunniuteqarsinnaanngilaq, aammalu tamatuma kingunerisaanik ajoqusernernut annaasanulluunniit akisussaatinneqarsinnaanani.

Paasissutissat tamarmik, internetikkut kiffartuussinerit aqqutigalugit allanit atugassiissutigineqartut atuisup nammineerluni akisussaaffigai. Atuisup tamatumunnga tunngatillugu pisuni tamani Tusass pisussaatissanngilaa. Taamatuttaaq internetimit atortussanik atuinermi piginneqqaartussaatitaanermut pisinnaatitaaffiit qulakkeerneqarnissaat atuisup akisussaaffigaa.

Atuisup internet niuernermut imaluunniit internetikkut sullissinernik pisinermut atorsimappagu Tusass akisussaasussaanngilaq, tamatumani atuisoq inullu alla kisimik tassani akisussaammata.

Atuisoq internetikkut sullinneqarnermini nammineerluni innaallagissamik pilersuissaaq, kiisalu Tusass-p atortui isumannaatsumik paarissallugit. Taamatuttaaq tamatumunnga atatillugu aningaasartuutaasinnaasut atuisup isumagissavai.

Atuisup sumiginnaanera (Tusass-p matusisinnaatitaanera) Qarasaasianut angallattakkanut sullissinermik, Tusass-p ingerlatseqatigiiffimmut akuersissut naapertorlugu neqeroorutigisaanik atuinermut piumasaqaatit naapertorlugit atuisup pisussaaffinnik annertuumik sumifiginnaanerani, atuisup sullissinermik atuineranut attaveqaammik unitsitsissalluni ingerlatseqatigiiffik pisinnaatitaavoq.

Pissutsit makku annertuumik sumiginnaanermut ilaasutut isigineqarput:

• Atuisup qarasaasiat allat internettikkut iserfiginiarpagit, imaluunniit sullississutit

  internetimut attavilikkat akuersissummik peqqaarani iserfiginiarpagit (hacking).

• Atuisup attaveqaataa atuisup ilisimasaanik ilisimanngisaanilluunniit, soorlu virusinik,

  spam-inik, phishing-inik il.il. siaruarterinermut atornerlunneqarpat. Internetimut kiffartuussivimmik atuisunut immikkut malitassat Inuussutissarsiortut

• Atuisup download-erinikkut, siaruarterinikkut assigisaatigulluunniit inuup allap piginnittussaatitaanera innarlerpagu.

• Atuisup nassitsinermut paasissutissat, tassunga ilanngullugit ip-adresset imaluunniit header-imut paasissutissat peerpagit imaluunniit peqquserlulluni allanngortippagit.

• Atuisup internetikkut ileqqorissaarnissamut maleruagassat allassimanngitsut sukkuluunniit atuuttut arlaleriarluni unioqqutippagit.

Internetimut kiffartuussivimmut attaveersineq piffissamik attaveersiffiusumi atuisuunermut akitsuutip akikillineqarneranik nassataqassanngilaq.

Matuma siuliani allassimasut naapertorlugit atuisup attaveqaataanik unitsitsisoqarpat, Tusass-p atuisuunermut isumaqatigiissut siumoortumik ilisimatitseqqaarani taamaatissinnaavaa.

Aamma Tusass-p sullissinernut tamanut piumasaqaataani sumiginnaanermut aalajangersakkat atorneqassapput.

Atortuulersinneqarnerat

Malitassat uku Naalakkersuisunit akuerineqarput, aammalu 01.09.2010-mi atuutilissallutik.

Atuisunulli Tusass-p pilersuineranut ingerlatsineranullu 01.09.2010 sioqqullugu isumaqatigiissuteqarsimasunut piumasaqaatit aatsaat 01.09.2010-mi atuutilissapput.

Nioqqummut Flatrate Internet-imut Inuussutissarsiutilinnut atuuttumut, piumasaqaatit tulliuttut tassunga tapiliussatut atuutilissapput:

1. Flatrate Internet Inuussutissarsiutilinnoortoq, suliffeqarfimmit Tusass A/S-imik isumaqatigiisuteqarsimasumit taamaallaat atorneqarsinnaavoq. Flatrate Internetip, Inuussutissarsiutilinnoortup allanut atukkiunneqarsinnaanera, avitseqatigiissutigineqarsinnaanera, attartortinneqarsinnaanera, tuneqqinneqarsinnaanera allatulluunniit pissarsiaritinneqarsinnaanera inerteqqutaavoq. Tusass A/S-ip Inuussutissarsiutilinnut sullississutaanik pilersuinera ingerlatsineralu pillugit malitassaataani nalinginnaasuni imm. 12 H naapertorlugu, siumoortumik ilisimatitseqqaarnani Flatrate Internetip Inuussutissarsiutilinnoortup qaminneqarneranik aammalu eqqartuussisutigoortitsinissaq siunertaralugu atornerluinerup oqartussaasunut nalunaarutigineqarneranik, atornerluineq kinguneqassaaq.

2. Nioqqummut tunnngatillugu piumasaqaatit taakku Tusass A/S-ip Inuussutissarsiutilinnut sullississutaanik pilersuinera ingerlatsineralu pillugit malitassaataanut nalinginnaasunut imaluunniit Internetimik kiffartuussinermi Inuussutissarsiutilinnut sullississutinut aalajangersimasunut malitassanut akerliusimappata, nioqqutinut malitassat uku salliutinneqassapput.